Gwamnatin kasar Rwanda ta kaddamar da allurar rigakafin kariya daga cutar Ebola a yammacin kasar mai iyaka da Jamhuriyar Dimokaradiyyar Congo.

A jiya Lahadi aka kaddamar da wannan allura ta rigakafi karo na farko don kare al’ummar kasar da ke rayuwa a yankunan da ke kusa da iyaka da Jamhuriyar Dimokuradiyyar Congo, kasar da cutar ta yi sanadiyyar mutuwar mutane da dama a wannan shekarar.

A kalla mutane dubu dari biyu (200,000) ne ake fatan yi wa allurar rigakafin a lardunan Rubuvu da kuma Rasizi da ke gabar kudu da kuma arewacin kogin Kivu, da ke matsayin iyakar da ta raba wadannan kasashe biyu.

Wani kamfanin rarraba magunguna da ke kasar Belgium ne ya samar wa kasar ta Rwanda wannan allura da kamfanin Johnson&Johnson ya sarrafa kamar dai yadda minista a ma’aikatar lafiyar kasar ta Rwanda Diane Gashumba ta sanar.

Duk da cewa ba a samu labarin bullar cutar ta Ebola a cikin kasar ta Rwanda ba, amma Hukumar Lafiya ta Duniya ta shawarci kasashen yankin musamman masu makotaka da Congo su tabbatar da cewa sun yi wa al’ummominsu wannan allura da za ta iya share tsawon watanni 12 tana aiki a jikin dan adam.